منظومة الطاقه الشمسيه .. ما لها وما عليها

خلونا نحكي شوي عن وضع منظومات الطاقة الشمسية اللي عم تتركب بسوريا…
الشي الي منعرفه أنها لعبة تجار كبار ومستغلين السوق وزيادة ساعات التقنين هنن السبب وراها متل ما صار أول ما نزلت المولدات وأول ما نزلت انفرترات الشور هالشي ما منختلف عليه
في ناس ركبت الطاقة الشمسية من أكتر من 7 سنين عنا بسوريا (أي بسوريا ومن أكتر من 7 سنين لا تستغرب ) بس ما كان في تسويق ألها فكان محدا بيتجرأ يبيعها ويركبها غير اللي دارسها وفهماناها صح وكانت المنظومة ما بتكلف هالمبالغ العالية فكانت الناس تركب منظومات كبيرة فلاقت أنو منظومة الطاقة الشمسية مجدية ونافعة ولو ماناه مجدية أكيد شركات سيريتل و MTN مارح تركب منها ( بس دققو على أنو المنظومة مدروسة صح والتركيب صح)
بس بهالصيفية اللي مضت منظومات الطاقة الشمسية لاقت ترويج هائل وتسويق ضخم (عالميا وليس بسوريا فقط) فهون تجارنا ما قصرت برفع الاسعار فأصبحت الطاقة الشمسية مكلفة جدا وحاليا عنا بسوريا أي شي بصير عليه تسويق بصير بيشتغلو فيه وبصراحة صارة شغلة اللي ماله شغلة (لان مو معقول لاقي حلاق حاطط على باب محله مجموعة بطاريات وألواح للبيع وجاهز لتركيبها كمان)
بهالصيفية بالبداية فئة الأغنياء عنا هي اللي ركبت منظومات الطاقة الشمسية فلما يجو لعندنا بدهن يركبو يطلبو منظومة طاقة شمسية قادرة على تشغيل المنزل بالكامل وما يهتمو للأسعار فنحسب الاحمال صح ونركبله ألواح طاقة كافية ونزيد لوحين أو اكتر زيادة في حالة الغيوم ونجهز الانفرتر مع الحمايات الكاملة طبعا كلفت المنظومة مبلغ كبير بس صدقا ارتاح اقل الشي 25 سنة بقدام من قصة الكهربا
طيب بعني إذا ما معنا فوق ال 10 مليون ما نركب منظومة طاقة شمسية ؟
لا ما بقلك لا تركب بس اكيد مارح شغلك البيت كامل مع سخان المياه والتدفئة أو اي حمل تقيل يعني
بس جيب واحد يحسبلك ياها صح ومنشان ما تنغش لازم يكون مجموع الواط تبع الألواح أكبر من الستطاعة اللي بدها تشغل احمالك
طيب كيف بدي اعرف احسبها وما انغش بهالموضوع ؟
بسيطة كتير نحن ما منحكي كتير بالوات أغلب كلامنا انو هالجهاز كم امبير بيسحبب
طيب تعالو نجمع كل جهاز كم امبير بيسحب او نستخدم بانسة الامبير لنعرف كم أمبير بتسحب اجهزتنا وبعد ما نعرف كم أمبير منحتاج منضربهن بالفولت تبع الكهربا اللي هو 220 فولت يعني ببساطة المعادلة الرياضية هي
الامبير X الفولت = الوات
طيب بعد ما طلع الوات معك لا ترضا بأنو يكون مجموع الواط تبع الألواح أقل من الواط اللي بتتطلبه أجهزتك لأن هون أول ما يشغلك الفني منظومتك بألواح طاقة غير كافية اجهزتك رح تشتغل وكله تمام بس رح يكون في سحب طاقة من الألواح والبطاريات يعني بدل ما أشحن البطاريات أنا عم أسحب منهن وطبعا انت هون بتلاقي كلشي شغال وتمام وبتحاسب الفني ولما بيجي الليل رح تلاقي البطاريات شبه فاضيات ورح تبقى تعاني من هالمشكلة لحتى إما تخفف اجهزة بيتك (مثلا تستغني عن تشغيل البراد) أو تزيد ألواح طاقة
فلهيك انتبه من اللي بقلك بركبلك منظومة 5500 وات وبتشغلك البيت كله وهو حاسبلك بدو يحطلك أربع ألواح طاقة ولو كانت أكبر مقاس وأكبر مقاس متوفر عنا بالسوق هو بحدود 590 وات طيب 4X590=2360 يعني عندي مجموع الوات تبع الألواح 2360 هي لسا ما حسبنا فاقد الطاقة اللي بصير على الألواح نتيجة زيادة أرتفاع درجة حرارة ألواح الطاقة أو انخفاض الاشعاع الشمسي الساقط على ألأواح الطاقة أو مرور غيمة مثلا يعني خلونا نقول بقي مجموع الواط تبع الألواح 2000 طيب كيف ألواحي 2000 وات وعم تقلي منظومتك 5500 وات
ال 5500 هي اكبر استطاعة بيتحمل الانفرتر يخرجها بس بده تغذية 6000 وات من ألواح الطاقة حتى يعطيك 5500 وات لبيتك ويكون في زيادة 500 وات حتى يقدر الانفرتر يشحن البطارية وتعطيك طاقة بالليل مو تلاقيها فاضية بعد غروب الشمس
وكذلك الأمر نفسه على منظومات ال 3500 وال3000 وال 2400
لازم تكون مجموع الوات تبع الألواح عالأقل مساوية بل ويجب أنت تكون أكتر من الواط اللي اجهزتك محتاجته لتشتغل
هي ناهيك عن اخطاء طرق التوصيل وتركيب الأنفرتر بشكل مزري جدا
فرجاء من كل شخص حابب يركب منظومات طاقة شمسية ينتبه لهالأمور لان عم يصير غش فيها كتر ومن هلا الناس بلشت تعاني من المنظومات وهي لسا ما دخلنا بالشتوية (المشكلة مو بأنو الطاقة الشمسية ما ناجحة ولا نافعة بالعكس تماما العالم بأكمله متوجه ألها) بس أنت انغشيت وركبولك منظومة غير مناسبة لأحمال أجهزتك
أنا ما بدي اقطع برزقة حدا بس اذا بدك تشتغل بمصلحة أشتغلها عن فهم وبشرف وضمير الناس عايفة حالها من تكاليف المعيشة بعد اللي صار فينا من الحرب وكتير من الناس عم تحط كل أموالها لتركب منظومات شمسية لبيتها فما عندها استطاعة تحط أموال على تكاليف صيانتها
وربي يوفق كل واحد بيشغل بضمير وكأنه عم يشتغلها لبيته
بعتذر الاطالة بس ما عدت أقدر أسكت عل هالتخبيص اللي عم شوفه بتركيب المنظومات الشمسية…